خايفة ليه من شعرة بيضا
نورت وسط السواد
نظرتك على إيه حزينة
عاملة ليه فيها حداد
اسمعى منى نصيحة
تبلغى بيها المراد
لسه باقى ألف فرصة
تتلحق قبل الميعاد
متخافيش من عمر يجرى
يسرق الحلم الجميل
اصبرى ده الصبر طيب
ايده خضرة مش بخيل
اقفلى ودنك واوعى
تسمعى كلمة (خلاص)
خلى أهدافك طريقك
مبدأك فيه الأساس
ثورتك تقلب نظامه
تخلعى أكبرها راس
ينهدم قصر الهزيمة
يتبنى برج الحماس
بكرة جاى بفرحة ليكى
توبها أبيض عالمقاس
كعبها عن أرضه عالى
جه على الأحزان وداس
فرحة من صنعة إيديكى
مش تسول وإلتماس
ياأميرة فى بلاطك
ياخليفة شهرزاد
خايفة ليه من شعرة بيضا
نورت وسط السواد
********
ألف وش بيظهرولك
والكلام بيلونوه
قالوا قطر الحب فاتك
قالوا كدب وصدقوه
رغم حلمك وإحتمالك
رغم صبرك بيشوفوه
زوروا قصة حياتك
حتى إسمك شوهوه
ظلم من الأحباب وجالك
يوم وفاتك أعلنوه
افتحى للحب بابك
حتى لو جم يقفلوه
نبض إحساسك شبابك
استحالة يمنعوه
اظهرى ضحكة عينيكى
اعلنى لحظة ميلاد
خايفة ليه من شعرة بيضا
نورت وسط السواد
*********
هو فى فى الدنيا أجمل
من بياض التلج لون
ايه هتفرق شعرة بيضا
فى حياتك إيش تكون
لو مضيقاكى اصبغيها
وابهرى بيها العيون
واصلى مشوارك شعارك
((مش هيقتلنى الجنون
عاملة دستورى زهورى
والربيع عملاه قانون))
قربى جنة خيالك
خلى أحزانك بعاد
خايفة ليه من شعرة بيضا
نورت وسط السواد
_بقلمى_
7-9-2011
(((أرمز للشعرة البيضاء لإحساس المرأة المبالغ به بعمرها ونظرة المجتمع فى المقابل
وليس بالضرورة أن تكون شعرة فى الرأس فشيخوخة القلب أفظع
