أمانة عليكى يادنيا
تفوتى عليا وتعدى
دى نظرة عطف من عندك
تلاقى الشكر من عندى
صحيح جناحاتى مكسورة
صحيح حلمى على أدى
وبروازى بلا صورة
وبستان الأسى خدى
ايديكى بفرحى مغلولة
تضنى عليا وتعاندى
وكفك بالهموم مداه
تجيبى جراح ولا تودى
تهادينى بأشواكك
وموجك يلتهم شطى
بلسعة شمس مسعورة
تدوب عضمى على جلدى
لكنى بتوبى مستورة
ولو انه مهوش وردى
نيران الشمس يبعدها
ومن برد الشتا يغطى
وأنا راضية مادام راضى
يسكنى الرضا بيته
ينيمنى على فرشة
يقولى ارتاحى واتمدى
اقوله الصبر طال بيا
يقولى اهى ليلة وتعدى
ويعنى العمر كام ليلة
أعيشه بغربتى وحدى
أمانة عليكى يادنيا
نادينى بإسمى لو مرة
ودلينى على العنوان
قوليلى ان انا حرة
فى كاسى ادلقى شهدك
ويلا نفذى وعدك
ادى العطشان وادى الجرة
تحلى دنيتى المُرة
وهأفضل ليكى مضطرة
وهأفضل مغرمة عطفك
وأحلف إن ده وعدى
نصيبى ألمح الضحكة
وأشوفها ساعات يدوب صدفة
وقلبى بالحنين يفتح
وأبواب الهوى قافلة
معاندة معايا
ايه يعنى
هأعيشها حياتى لو ثانية
أمانة عليكى يادنيا
ليست هناك تعليقات:
إرسال تعليق